Gürcüstanın paytaxtı Tiflisdə yanacaq qiymətlərinin bahalaşmasına etiraz olaraq aksiya keçirilir.

Aksiya iştirakçıları Respublika meydanına, parlament binasının önünə istiqamətlənib.

Bəzi sürücülər Qəhrəmanlar meydanında avtomobillərini yolun ortasında saxlayıblar və buna görə nəqliyyatın hərəkəti iflic olub. Ancaq qısa müddətdən sonra polis yolu açmağı bacarıb.

Aksiya iştirakçılarının tələbi yanacaq üçün aksizlərin ləğvi və ƏDV-nin “üzən rejimə” keçirilməsidir, bunun nəticəsində yanacağın 0,8-0,9 lari ucuzlaşacağı bildirilir.

Etirazçılar həmçinin səlahiyyətli şəxslərlə görüş tələb edirlər, əks halda aksiyaların daimi olacağını bildirirlər.

Aksiyalar Batumi, Ozurqeti, Kutaisi və Telavidə də baş tutub.

Qeyd edək ki, Gürcüstanda yanacaq 4 lariyə qalxıb.